اسلام آباد – وزیراعظم شہباز شریف نے کہا ہے کہ کشمیر پاکستان کی شہ رگ اور بین الاقوامی طور پر تسلیم شدہ متنازع علاقہ ہے، بھارت نے پہلگام واقعے پر بغیر کسی ثبوت کے الزام تراشی کی، اور پانی پر کوئی سمجھوتہ نہیں کیا جائے گا۔
پاکستان ملٹری اکیڈمی کاکول میں پاسنگ آؤٹ پریڈ سے خطاب کرتے ہوئے وزیراعظم نے کہا کہ ہماری مسلح افواج تنظیم، اتحاد اور قومی مفاد کی تکمیل کا نشان ہیں اور اپنی اعلیٰ پیشہ ورانہ صلاحیتوں کے باعث دنیا بھر میں منفرد مقام رکھتی ہیں۔ انہوں نے مزید کہا کہ پاکستان عالمی امن کے قیام کے لیے اپنی بین الاقوامی ذمے داریاں پوری کرتا رہے گا۔
وزیراعظم نے پہلگام واقعے اور مسئلہ کشمیر پر گفتگو کرتے ہوئے کہا کہ کشمیری عوام کو ان کا حق خود ارادیت دینا ہوگا۔ انہوں نے کہا کہ پاکستان نے ہمیشہ دہشت گردی کی ہر شکل کی مذمت کی ہے اور دہشت گردی کے خلاف جنگ میں بھاری جانی و مالی قربانیاں دی ہیں۔
شہباز شریف نے بھارت کی جانب سے پاکستان پر لگائے گئے الزامات کو مسترد کرتے ہوئے کہا کہ پاکستان پہلگام واقعے کی غیر جانبدارانہ تحقیقات میں تعاون کے لیے تیار ہے۔ انہوں نے بھارت کو متنبہ کیا کہ پانی پاکستان کی لائف لائن ہے اور اس پر کوئی سمجھوتہ نہیں ہوگا، اگر کوئی مہم جوئی کی گئی تو پاکستان فروری 2019 کی طرح بھرپور اور منہ توڑ جواب دے گا۔
وزیراعظم نے مزید کہا کہ پاکستان اپنی سلامتی اور خودمختاری کا ہر قیمت پر تحفظ کرے گا اور پانی روکنے کی کسی بھی کوشش کا قومی طاقت سے جواب دے گا۔ شہباز شریف نے زور دیا کہ وطن عزیز کی سالمیت پر کوئی آنچ نہیں آنے دی جائے گی اور ہر مہم جوئی کا ڈٹ کر مقابلہ کیا جائے گا۔
انہوں نے کہا کہ حکومت معاشی استحکام کے لیے بھرپور کوششیں کر رہی ہے، سرمایہ کاری میں اضافے اور اقتصادی ترقی پر توجہ مرکوز ہے۔ افغانستان کے حوالے سے بات کرتے ہوئے وزیراعظم نے کہا کہ پاکستان پُرامن اور مستحکم تعلقات کا خواہاں ہے اور افغان حکومت سے توقع کرتا ہے کہ وہ اپنی سرزمین کو دہشت گرد عناصر کے لیے استعمال نہیں ہونے دے گی۔
