کراچی: قانون کے محافظ ہی قانون شکن بن گئے۔ شاہین فورس کے اہلکاروں کی جانب سے طالب علم سے مبینہ لوٹ مار، تشدد اور جھوٹا بیان ریکارڈ کروانے کا افسوسناک واقعہ سامنے آیا ہے۔ یہ واقعہ عزیز بھٹی تھانے کی حدود میں پیش آیا، جہاں وردی میں ملبوس اہلکاروں نے موٹر سائیکل سوار طالب علم کو چیکنگ کے بہانے روکا اور زیادتی کا نشانہ بنایا۔
متاثرہ طالب علم کے مطابق اہلکاروں نے نہ صرف اس سے 5 ہزار روپے نقدی، قومی شناختی کارڈ اور موبائل فون چھینا بلکہ اس پر تشدد کرتے ہوئے اسے جعلی ڈاکو قرار دیا۔ اہلکاروں نے زبردستی ایک جھوٹا بیان بھی طالب علم کے موبائل پر ریکارڈ کیا، جس میں اسے مجرم ظاہر کیا گیا۔ طالب علم کا کہنا ہے کہ اہلکاروں نے اسے پولیس مقابلے میں مارنے کی دھمکیاں بھی دیں۔
واقعے کی سنگینی اس وقت بڑھ گئی جب اہلکاروں نے طالب علم سے دو لاکھ روپے کا تقاضا کیا اور رقم نہ دینے کی صورت میں جان سے مارنے کی دھمکیاں دیں۔ اہلکاروں نے طالب علم کے موبائل فون سے اس کے والد سے بھی رابطہ کیا اور رقم کا مطالبہ کیا۔ بعد ازاں طالب علم کو ڈرا دھمکا کر چھوڑ دیا گیا اور سخت تنبیہ کی گئی کہ اگر اس واقعے کا کسی سے ذکر کیا تو سنگین نتائج بھگتنا ہوں گے۔
واقعے کی خبر میڈیا اور سوشل میڈیا کے ذریعے پھیلنے کے بعد ایس پی گلشن نے فوری ایکشن لیتے ہوئے واقعے میں ملوث دونوں اہلکاروں کو معطل کر دیا ہے اور انکوائری کا حکم دے دیا ہے۔ ترجمان پولیس کا کہنا ہے کہ واقعے کی شفاف اور مکمل تحقیقات کے بعد ذمہ داران کے خلاف سخت قانونی کارروائی عمل میں لائی جائے گی۔
