لاہور: حالیہ پاک بھارت کشیدگی کے تناظر میں پنجاب بھر کے تمام نجی اسپتالوں کو ہائی الرٹ کر دیا گیا ہے۔ پنجاب ہیلتھ کیئر کمیشن کی جانب سے جاری کردہ مراسلے میں تمام پرائیویٹ اسپتالوں کو ہدایت دی گئی ہے کہ وہ اپنے 35 فیصد بیڈز ہنگامی صورتحال کے لیے مختص کریں۔
مراسلے کے مطابق، تمام اسپتالوں کو حکم دیا گیا ہے کہ وہ ایمرجنسی پلان ترتیب دیں، آپریشن تھیٹرز، طبی مشینری اور آلات کو مکمل فعال رکھیں۔ اس کے ساتھ ساتھ ایمرجنسی ادویات، ڈسپوزایبلز اور دیگر ضروری طبی سامان کا وافر اسٹاک ذخیرہ کرنے کی ہدایت کی گئی ہے۔
مراسلے میں مزید کہا گیا ہے کہ نجی اسپتالوں میں جنریٹرز مکمل فعال اور درست حالت میں ہونے چاہئیں، پانی اور دیگر بنیادی سہولیات کی دستیابی یقینی بنائی جائے، جبکہ ڈاکٹروں اور دیگر طبی عملے کی موجودگی کو بھی ہر صورت یقینی بنایا جائے۔
دوسری جانب، وفاقی وزیرِ صحت مصطفیٰ کمال نے بھی ملک بھر کے سرکاری اسپتالوں میں صحت ایمرجنسی نافذ کرنے کا اعلان کیا، جس کے بعد پنجاب میں تین ہفتوں سے جاری گرینڈ ہیلتھ الائنس کی ہڑتال ختم کر دی گئی ہے۔
