لاہور: پاکستان تحریک انصاف کے رہنما میاں عباد فاروق کو کوٹ لکھپت جیل سے رہا کر دیا گیا۔ وہ 9 مئی کے واقعات میں مبینہ طور پر ملوث ہونے پر دو سال قید کی سزا کاٹ رہے تھے۔
ذرائع کے مطابق، میاں عباد فاروق کی رہائی عدالتی فیصلے اور مکمل قانونی کارروائی کے بعد عمل میں آئی۔ ان پر جلاؤ گھیراؤ اور اشتعال انگیزی کے الزامات عائد کیے گئے تھے، جن کے تحت وہ کافی عرصے سے زیر حراست تھے۔
رہائی کے موقع پر جیل کے باہر پی ٹی آئی کارکنوں اور ان کے اہل خانہ کی بڑی تعداد موجود تھی، جہاں ان کا گرمجوشی سے استقبال کیا گیا۔ کارکنوں نے نعرے بازی کی اور خوشی کا اظہار کیا۔
تحریک انصاف کی قیادت نے میاں عباد فاروق کی رہائی کو انصاف کی جیت قرار دیا ہے اور کہا ہے کہ سیاسی کارکنوں کو غیر قانونی طور پر قید کرنے کا سلسلہ بند ہونا چاہیے۔
