اوکلاہوما: امریکہ میں ایک حیران کن اور رومانوی لمحہ اُس وقت منظرِ عام پر آیا جب ایک جوڑے نے تباہ کن طوفان کے عین سامنے منگنی کر کے سوشل میڈیا پر دھوم مچا دی۔ یہ واقعہ امریکی ریاست اوکلاہوما کے شہر آرنیٹ میں پیش آیا، جہاں میٹ مِشل نے اپنی محبوبہ بیکی پٹیل کو شادی کی پیشکش کی — وہ بھی اُس لمحے جب پیچھے ایک شدید ٹورنیدو طوفان گردش کر رہا تھا۔
یہ ویڈیو، جو میٹ کے ایک دوست نے فلمائی، دیکھتے ہی دیکھتے سوشل میڈیا پر وائرل ہو گئی اور لاکھوں صارفین کے دل جیت لیے۔ بیکی، جو کینیڈا سے تعلق رکھتی ہیں، نے انسٹاگرام پر اس لمحے کو اپنی زندگی کا “سب سے خاص اور ناقابلِ فراموش دن” قرار دیا۔
ویڈیو میں واضح طور پر دیکھا جا سکتا ہے کہ میٹ گھٹنے ٹیک کر بیکی کو انگوٹھی پیش کرتے ہیں جبکہ پس منظر میں بادلوں کی گرج اور طوفان کی گھن گرج سنائی دیتی ہے۔ جواب میں بیکی خوشی سے اُنہیں گلے لگا لیتی ہیں۔
میٹ مِشل ایک تجربہ کار اسٹورم چیزر (طوفانوں کا پیچھا کرنے والے ماہر) ہیں اور گزشتہ چھ سالوں سے شدید موسموں کا مشاہدہ کر رہے ہیں۔ بیکی ابتدا میں صرف دو ہفتے کے لیے طوفانوں کا مشاہدہ کرنے آئی تھیں، لیکن میٹ کی پیشکش پر وہ ایک ہفتہ مزید رک گئیں — اور اسی دوران دونوں کے درمیان ایک خوبصورت رشتہ پروان چڑھا۔
