راولپنڈی: پاکستان اور جنوبی افریقہ کے درمیان ٹیسٹ سیریز کے دوسرے اور آخری میچ کے پہلے روز کے اختتام پر قومی ٹیم نے 5 وکٹوں کے نقصان پر 259 رنز بنا لیے۔
راولپنڈی اسٹیڈیم میں کھیلے جا رہے میچ میں پاکستان کے کپتان شان مسعود نے ٹاس جیت کر پہلے بیٹنگ کا فیصلہ کیا۔ قومی ٹیم کو پہلا نقصان 35 کے مجموعی اسکور پر ہوا جب اوپنر امام الحق 17 رنز بنا کر اسپنر سمن ہارمر کی گیند پر بولڈ ہو گئے۔
عبداللہ شفیق نے 57 رنز کی اننگز کھیل کر ٹیم کے اسکور میں اہم کردار ادا کیا مگر وہ بھی ہارمر کی گیند پر وکٹ گنوا بیٹھے۔ کپتان شان مسعود نے پُراعتماد بیٹنگ کا مظاہرہ کرتے ہوئے نصف سنچری اسکور کی، تاہم بابر اعظم ایک بار پھر بڑی اننگز کھیلنے میں ناکام رہے اور 16 رنز بنا کر کیشو مہاراج کی گیند پر آؤٹ ہو گئے۔
محمد رضوان 19 رنز بنانے کے بعد پویلین لوٹ گئے جبکہ پہلے روز کے اختتام پر سعود شکیل 42 اور سلمان علی آغا 10 رنز کے ساتھ ناٹ آؤٹ ہیں۔
جنوبی افریقہ کی جانب سے کیشو مہاراج اور سمن ہارمر نے 2، 2 وکٹیں حاصل کیں، جب کہ کگیسو ربادا نے ایک کھلاڑی کو آؤٹ کیا۔
قبل ازیں ٹاس کے موقع پر قومی کپتان شان مسعود نے کہا کہ پچ خشک دکھائی دے رہی ہے، اس لیے پہلے بیٹنگ کا فیصلہ بہتر سمجھا۔ جنوبی افریقی کپتان ایڈن مارکرم نے بتایا کہ ان کی ٹیم میں دو تبدیلیاں کی گئی ہیں، مارکو جینسن اور کیشو مہاراج کو شامل کیا گیا ہے۔
پاکستان کی جانب سے ایک تبدیلی کی گئی، فاسٹ بولر حسن علی کی جگہ آصف آفریدی کو موقع دیا گیا جنہوں نے 39 سال 299 دن کی عمر میں ٹیسٹ ڈیبیو کیا۔ انہیں شاہین شاہ آفریدی نے ٹیسٹ کیپ دی۔
پاکستان کی ٹیم میں شان مسعود (کپتان)، امام الحق، عبداللہ شفیق، بابر اعظم، سعود شکیل، محمد رضوان، سلمان علی آغا، شاہین شاہ آفریدی، نعمان علی، ساجد خان اور آصف آفریدی شامل ہیں۔
مہمان ٹیم میں ایڈن مارکرم (کپتان)، ریان ریکلٹن، ٹرسٹن سٹبس، ٹونی ڈی زورزی، ڈیوالڈ بریوس، کائل ویرائن، سمن ہارمر، مارکو جینسن، میتھو سامی، کیشو مہاراج اور کگیسو ربادا شامل ہیں۔
پاکستان ٹیم سیریز میں 0-1 کی برتری کے ساتھ پروٹیز کو کلین سویپ کرنے کے لیے پرعزم ہے۔ گرین شرٹس نے لاہور ٹیسٹ میں جنوبی افریقہ کو 93 رنز سے شکست دی تھی۔
