ٹرمپ پالیسی کے اثرات: بھارتی کمپنی ٹاٹا کا امریکا میں مقامی افراد کو بھرتی کرنے کا اعلان

ممبئی: ٹاٹا ٹیکنالوجیز نے امریکا میں مقامی افراد کی بھرتی میں اضافہ کرنے کا اعلان کیا ہے، جو امریکی صدر ڈونلڈ ٹرمپ کی امیگریشن پالیسیوں کے تحت ایچ-1 بی ویزا فیس میں اضافے کے بعد سامنے آیا ہے۔ ٹرمپ انتظامیہ کا کہنا ہے کہ اس اقدام کا مقصد امریکی ورک فورس کو غیر ملکی ملازمین کے مقابلے میں زیادہ تحفظ فراہم کرنا ہے۔ ٹاٹا ٹیکنالوجیز کے سی ای او وارن ہیریس نے رائٹرز سے گفتگو میں کہا کہ کمپنی ویزا قوانین میں تبدیلیوں کے جواب میں امریکا میں مقامی بھرتیوں کو ترجیح دے گی۔ ان کے مطابق امریکا کمپنی کے لیے ایک اہم اور متحرک مارکیٹ ہے، جہاں آئندہ چھ سے نو ماہ میں کاروباری سرگرمیوں میں بہتری کی توقع ہے۔ ٹاٹا ٹیکنالوجیز، جو انجینئرنگ اور ٹیکنالوجی خدمات فراہم کرتی ہے، کے دنیا بھر میں 12 ہزار سے زائد ملازمین ہیں اور کمپنی اپنی سالانہ آمدنی کا تقریباً 20 فیصد شمالی امریکا سے حاصل کرتی ہے۔ عالمی سطح پر اپنی موجودگی کو مضبوط بنانے کے لیے کمپنی نے حال ہی میں جرمن کمپنی ES-Tec گروپ کو 75 ملین یورو میں خریدنے کا اعلان کیا ہے، جبکہ مستقبل میں مزید ہدفی خریداریوں کی منصوبہ بندی بھی کی جا رہی ہے۔ ٹاٹا ٹیکنالوجیز کے اہم کلائنٹس میں جےگوار لینڈ روور، ون فاسٹ اور بوئنگ شامل ہیں۔