واشنگٹن: امریکی دارالحکومت واشنگٹن کے رونالڈ ریگن نیشنل ایئرپورٹ پر بم کی اطلاع ملنے کے بعد تمام پروازوں کو عارضی طور پر معطل کر دیا گیا۔ اطلاع ایک یونائیٹڈ ایئرلائنز کی پرواز سے متعلق تھی جو لینڈنگ کے بعد ایئرپورٹ پر موجود تھی۔ حکام نے احتیاطی طور پر طیارے کو ایئرپورٹ کے مشرقی حصے میں منتقل کر دیا تاکہ سیکیورٹی ادارے تفتیش کر سکیں۔
فیڈرل ایوی ایشن ایڈمنسٹریشن (FAA) کے مطابق، طیارے میں ممکنہ بم کی اطلاع ملنے کے بعد فوری طور پر تمام مسافروں کو بحفاظت جہاز سے اتار لیا گیا۔ ایف اے اے کے بیان میں کہا گیا ہے کہ جہاز کو ٹرمینل سے دور لے جایا گیا تاکہ تفتیش کے دوران کسی قسم کا خطرہ لاحق نہ ہو۔
ذرائع کے مطابق، یونائیٹڈ ایئرلائنز کی اس پرواز میں بم کی اطلاع موصول ہونے پر ایئرپورٹ کی سیکیورٹی فورسز، بم ڈسپوزل اسکواڈ اور ایمرجنسی ٹیموں کو فوری طور پر طلب کر لیا گیا۔ اگرچہ حکام نے اب تک خطرے کی نوعیت یا اطلاع کی تصدیق کے بارے میں کوئی باضابطہ بیان جاری نہیں کیا ہے، تاہم ایئر ٹریفک کنٹرول کی ایک ریکارڈنگ میں یہ ہدایت سنی گئی کہ “طیارے کو ایئرپورٹ سے دور لے جایا جائے کیونکہ پرواز سے متعلق غیر تصدیق شدہ بم کی اطلاع موصول ہوئی ہے۔”
ابتدائی اطلاعات کے مطابق، واقعے کے بعد ایئرپورٹ کے تمام فلائٹ آپریشنز عارضی طور پر معطل کر دیے گئے، جب کہ ٹرمینلز اور اطراف کے علاقوں کو بھی کلیئر کرا لیا گیا۔ سیکیورٹی ادارے بم کی اطلاع کی تصدیق کے لیے مکمل تفتیش کر رہے ہیں۔
یونائیٹڈ ایئرلائنز اور ایف اے اے نے کہا ہے کہ تمام مسافر محفوظ اور بحفاظت باہر منتقل کر دیے گئے ہیں، جبکہ ایئرپورٹ پروازوں کی بحالی سے متعلق فیصلہ تحقیقات مکمل ہونے کے بعد کیا جائے گا۔
