قلات: بلوچستان کے ضلع قلات میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے بھارتی سرپرستی یافتہ تنظیم فتنۃ الہندوستان کے 4 دہشت گردوں کو ہلاک کر دیا۔ کارروائی کے دوران دہشت گردوں کے ٹھکانے سے بھاری مقدار میں اسلحہ اور گولہ بارود بھی برآمد ہوا۔
پاک فوج کے شعبہ تعلقات عامہ (آئی ایس پی آر) کے مطابق، یہ آپریشن یکم نومبر کی رات دہشت گردوں کی موجودگی کی مصدقہ اطلاع پر کیا گیا۔ سیکیورٹی فورسز نے انتہائی مہارت کے ساتھ دہشت گردوں کے ٹھکانے کو نشانہ بنایا، جس کے نتیجے میں بھارتی پراکسی گروہ سے تعلق رکھنے والے چار دہشت گرد مارے گئے۔
آئی ایس پی آر کے بیان میں کہا گیا ہے کہ مارے جانے والے دہشت گرد بلوچستان اور دیگر علاقوں میں تخریبی سرگرمیوں اور دہشت گردانہ حملوں میں ملوث تھے۔ علاقے میں مزید ممکنہ خطرات کے پیشِ نظر کلیئرنس آپریشن جاری ہے تاکہ کسی بھی باقی ماندہ دہشت گرد کو تلاش کر کے ختم کیا جا سکے۔
ترجمان کے مطابق، سیکیورٹی فورسز عزمِ استحکام ویژن کے تحت انسدادِ دہشت گردی کی مہم پوری قوت کے ساتھ جاری رکھے ہوئے ہیں اور یہ آپریشن ملک سے غیر ملکی حمایت یافتہ دہشت گردی کے مکمل خاتمے تک جاری رہے گا۔
قومی قیادت کا سیکیورٹی فورسز کو خراج تحسین
صدرِ مملکت آصف علی زرداری نے قلات میں کامیاب آپریشن پر سیکیورٹی فورسز کو خراجِ تحسین پیش کرتے ہوئے کہا کہ بھارتی پشت پناہی والے دہشت گردوں کا خاتمہ قومی سلامتی کے لیے ایک اہم کامیابی ہے۔ انہوں نے کہا کہ قوم اپنے سیکیورٹی اداروں کے ساتھ کھڑی ہے اور دہشت گردی کے مکمل خاتمے کے عزم پر قائم ہے۔
وزیرِ اعظم شہباز شریف نے بھی فورسز کی کامیابی کو سراہتے ہوئے کہا کہ بھارتی حمایت یافتہ دہشت گردوں کے خلاف مؤثر کارروائی سیکیورٹی فورسز کی پیشہ ورانہ صلاحیتوں کا مظہر ہے۔ ان کا کہنا تھا کہ دہشت گردی کے خلاف جنگ اس وقت تک جاری رہے گی جب تک ملک مکمل طور پر محفوظ نہیں ہو جاتا۔
وفاقی وزیر داخلہ محسن نقوی نے بھی سیکیورٹی فورسز کو سلام پیش کیا۔ انہوں نے کہا کہ فورسز نے بروقت کارروائی کر کے بھارتی اسپانسرڈ دہشت گردوں کے ناپاک عزائم کو ناکام بنایا۔ محسن نقوی کا کہنا تھا کہ یہ کارروائی واضح پیغام ہے کہ پاکستان میں فتنۃ الہندوستان جیسے نیٹ ورکس کے لیے کوئی جگہ نہیں۔
