اسلام آباد: وزیراعلیٰ خیبر پختونخوا سہیل آفریدی کے خلاف جھوٹے اور گمراہ کُن بیانات کے ذریعے ریاستی اداروں کی ساکھ کو نقصان پہنچانے کے الزامات پر مقدمہ درج کرلیا گیا۔ نیشنل سائبر کرائم انویسٹی گیشن ایجنسی نے یہ مقدمہ پیکا ایکٹ کے تحت درج کیا۔
ذرائع کے مطابق، مقدمہ سائبر کرائم رپورٹنگ سینٹر اسلام آباد میں ایک شہری کی شکایت پر درج کیا گیا۔ ایف آئی آر کے متن میں کہا گیا ہے کہ سہیل آفریدی نے سوشل میڈیا پر جھوٹے اور بے بنیاد بیانات پر مبنی ویڈیوز پھیلائیں، جن میں ریاستی اور قومی سلامتی کے اداروں کے خلاف نفرت انگیز اور گمراہ کن مواد شامل تھا۔
مزید کہا گیا ہے کہ سوشل میڈیا پر موجود ان ویڈیوز کے ذریعے اداروں کی ساکھ کو نقصان پہنچانے کی کوشش کی گئی۔ ایف آئی آر میں یہ الزام بھی عائد کیا گیا ہے کہ وزیراعلیٰ کے پی نے اڈیالہ جیل کے باہر میڈیا سے گفتگو میں ریاستی اداروں کے خلاف بیانات دیے، جنہیں بعد ازاں پی ٹی آئی کے آفیشل سوشل میڈیا پیچ پر بھی شیئر کیا گیا۔
