اسلام آباد: سینیٹ نے 27ویں آئینی ترمیم کے تحت صدرِ مملکت کو تاحیات گرفتاری سے استثنیٰ دینے کی شق کثرتِ رائے سے منظور کرلی۔ ایوانِ بالا کا اجلاس چیئرمین یوسف رضا گیلانی کی صدارت میں منعقد ہوا، جس میں 27ویں آئینی ترمیم کی مختلف شقوں پر مرحلہ وار ووٹنگ کی گئی۔
وزیرِ قانون اعظم نذیر تارڑ نے آرٹیکل 248 میں ترمیم پیش کی، جس کے مطابق صدرِ مملکت کو ان کے عہدے سے سبکدوش ہونے کے بعد بھی کسی بھی قانونی کارروائی یا گرفتاری سے استثنیٰ حاصل ہوگا۔
تاہم، ترمیم میں یہ وضاحت شامل کی گئی ہے کہ اگر سبکدوش صدر بعد میں کوئی عوامی عہدہ سنبھالتے ہیں تو یہ استثنیٰ خود بخود ختم ہو جائے گا۔
ذرائع کے مطابق، صدرِ مملکت کو تاحیات استثنیٰ دینے کی یہ شق پاکستان پیپلز پارٹی کے مطالبے پر آئینی ترمیم کے مسودے میں شامل کی گئی تھی، جسے ایوان نے اکثریتی ووٹ سے منظور کیا۔
