اسلام آباد: سابق چیف جسٹس جواد ایس خواجہ نے ستائیسویں آئینی ترمیم کو چیلنج کرتے ہوئے سپریم کورٹ میں آئین کے آرٹیکل 184(3) کے تحت درخواست دائر کر دی۔ درخواست میں فیڈریشن آف پاکستان اور وزارت قانون و انصاف کو فریق بنایا گیا ہے۔
درخواست میں مؤقف اختیار کیا گیا ہے کہ پارلیمنٹ سپریم کورٹ کے آئینی دائرہ اختیار کو کم نہیں کر سکتی اور نہ ہی اس کا اختیار کسی اور عدالت یا فورم کو منتقل کیا جا سکتا ہے۔ درخواست گزار کے مطابق ستائیسویں آئینی ترمیم کے ذریعے سپریم کورٹ کے اختیارات میں کمی کرنا غیر آئینی اقدام ہے۔
جواد ایس خواجہ نے اپنی درخواست میں استدعا کی ہے کہ سپریم کورٹ اس بات کا اعلان کرے کہ وہ خود آئینی ترامیم کی آئینی حیثیت کا تعین کرنے کی مجاز عدالت ہے، اور کسی بھی آئینی یا عدالتی فورم کو یہ اختیار دینا آئین سے متصادم ہے۔
درخواست میں یہ بھی کہا گیا ہے کہ ہائی کورٹ کے ججز کی منتقلی سے متعلق شقیں آئین کے منافی ہیں، لہٰذا انہیں کالعدم قرار دیا جائے۔ مزید یہ کہ مقدمے کے حتمی فیصلے تک ستائیسویں ترمیم کے متنازعہ حصوں پر عملدرآمد روکنے کا حکم جاری کیا جائے۔
