اسلام آباد میں وزیراعظم محمد شہباز شریف سے امریکا میں مقیم سکھ برادری کی تنظیم کے صدر جسدیپ سنگھ نے ملاقات کی۔ اس موقع پر وفاقی وزیر قانون و انصاف اعظم نذیر تارڑ اور پاکستانی نژاد امریکی کاروباری شخصیت ساجد تارڑ بھی موجود تھے۔ وزیراعظم نے جسدیپ سنگھ کو پاکستان آمد پر خوش آمدید کہا۔
وزیراعظم شہباز شریف نے کہا کہ پاکستان میں سکھ برادری کے مقدس مذہبی مقامات موجود ہیں جہاں دنیا بھر سے سکھ یاتری آتے ہیں، اور پاکستان ان کی ہمیشہ بھرپور مہمان نوازی کرتا ہے۔ انہوں نے کہا کہ حکومت سکھ برادری کو ہر ممکن سہولیات فراہم کرنے کے لیے کوشاں ہے اور سکھوں کے مقدس مقامات اور گردواروں کی بہترین دیکھ بھال حکومت کے لیے باعثِ فخر ہے۔
شہباز شریف نے مزید کہا کہ پاکستان میں مقیم سکھ برادری کی فلاح و بہبود اور بیرون ملک سے آنے والے یاتریوں کے لیے مزید سہولیات فراہم کرنے کے حوالے سے جامع حکمت عملی تیار کی جائے گی۔ انہوں نے سمندر پار پاکستانیوں کے کردار کو سراہتے ہوئے کہا کہ بیرون ملک پاکستانی ملک کی ترقی، خوشحالی اور عالمی سطح پر پاکستان کے تشخص کو اجاگر کرنے میں اہم کردار ادا کر رہے ہیں۔
جسدیپ سنگھ نے پاکستان میں ملنے والی گرمجوش میزبانی پر وزیراعظم اور حکومت پاکستان کا شکریہ ادا کیا اور سکھ یاتریوں کے لیے فراہم کی گئی سہولیات کو سراہا۔
