ترکیہ یوکرین اور غزہ میں امن کی کوششوں پر توجہ مرکوز کر رہا ہے، طیب اردوان

جوہانسبرگ میں جی 20 اجلاس سے خطاب کرتے ہوئے ترک صدر رجب طیب اردوان نے کہا ہے کہ ترکیہ بین الاقوامی سطح پر امن کی کوششوں پر بھرپور توجہ دے رہا ہے، خصوصاً یوکرین اور غزہ میں جاری تنازعات کے حل کے لیے۔

صدر اردوان نے روس اور یوکرین کے درمیان جنگ بندی کے قیام کے لیے مذاکرات کا اعلان کرتے ہوئے کہا کہ وہ روسی صدر ولادیمیر پیوٹن سے جنگ بندی کے معاملات پر بات کریں گے۔ مذاکرات میں ترکیہ بلیک سی کے راستے اناج کی محفوظ ترسیل کو بھی یقینی بنانے کا مطالبہ کرے گا، اور مذاکرات کے نتائج یورپی اور امریکی رہنماؤں کے ساتھ بھی شیئر کیے جائیں گے۔

اردوان نے مزید کہا کہ ترکیہ غزہ میں بین الاقوامی سکیورٹی فورس بھیجنے پر غور کر رہا ہے۔ ترکیہ نے غزہ میں پہلے بھی امن معاہدے میں اہم کردار ادا کیا اور اس معاہدے پر دستخط کیے۔ صدر اردوان نے یقین دلایا کہ ترکیہ اس معاہدے کی نگرانی کرے گا۔

انہوں نے کہا کہ سوڈان کے رہنما بھی چاہتے ہیں کہ ترکیہ امن کوششوں میں شامل ہو، اور ترکیہ سوڈان میں جاری تنازع کے خاتمے کے لیے بھرپور کوششیں کر رہا ہے۔