لاہور: مسلم لیگ ن کے صدر اور سابق وزیراعظم محمد نواز شریف نے نومنتخب ارکان قومی اسمبلی سے خطاب کرتے ہوئے کہا کہ عوام نے نفرت، جھوٹ، گالی گلوچ اور بدتمیزی کی سیاست کو مسترد کر دیا ہے۔ انہوں نے نومنتخب ارکان کو مبارکباد دی اور کہا کہ اللہ کے فضل سے جھوٹ اور فتنے کو شکست ہوئی۔
نواز شریف نے کہا کہ 2017 میں ملک تیزی سے ترقی کر رہا تھا لیکن موجودہ دور میں ملک دیوالیہ ہونے کے دہانے پر پہنچ گیا۔ ان کا کہنا تھا کہ گزشتہ دور حکومت میں ملک میں صرف تباہی آئی، مہنگائی بڑھی اور فیصلے خود کرنے کی صلاحیت محدود ہو گئی۔ نواز شریف نے اپنے بھائی شہباز شریف اور بیٹی مریم نواز کی کاوشوں کو سراہا اور کہا کہ عوام نے کارکردگی کی بنیاد پر مسلم لیگ ن کو ووٹ دیا۔
تقریب سے خطاب کرتے ہوئے وزیراعلیٰ پنجاب مریم نواز شریف نے کہا کہ سب سے پہلے اللہ کا شکر ادا کرتی ہوں، نواز شریف اور ان کی پوری ٹیم کو مبارکباد دیتی ہوں اور تمام نومنتخب ارکان اسمبلی کو کامیابی پر خوش آمدید کہتی ہوں۔
مریم نواز نے کہا کہ پارٹی کارکنان نے ہر حلقے میں سخت محنت کی اور مشکلات کے باوجود ہر انتخاب میں حصہ لیا۔ انہوں نے کہا کہ عوام نے بدترین حکومتی دور اور سازشوں کے باوجود مسلم لیگ ن کو ووٹ دے کر اپنا اعتماد ظاہر کیا۔
وزیراعلیٰ پنجاب نے مزید کہا کہ نواز شریف تین بار وزیراعظم منتخب ہوئے، اور ہر بار سازش کے باوجود عوام نے ان کی قیادت کو تسلیم کیا۔ انہوں نے کہا کہ عوام نعرے اور عملی اقدامات میں فرق سمجھ گئے ہیں اور پنجاب میں امن، تعلیم، صحت اور بنیادی سہولیات کی بہتری کی وجہ سے مسلم لیگ ن کو ووٹ ملا۔
مریم نواز نے کہا کہ پنجاب میں روٹی کی قیمتیں ڈیڑھ سال سے مستحکم ہیں، گرین بس کے ذریعے عوام کو آرام دہ سفر میسر ہے اور سڑکیں، گلیاں صاف کی جا رہی ہیں۔ انہوں نے کہا کہ مسلم لیگ ن کا مستقبل روشن ہے اور پارٹی کے نومنتخب ارکان اسمبلی کو عوام کی خدمت جاری رکھنی چاہیے۔
