تل ابیب: اسرائیل کے وزیراعظم بینجمن نیتن یاہو نے برسوں سے زیرِ سماعت کرپشن کیس میں معافی کے لیے صدر کو باضابطہ درخواست جمع کروا دی ہے۔ غیرملکی خبرایجنسی کے مطابق نیتن یاہو نے مؤقف اختیار کیا ہے کہ فوجداری ٹرائل ان کی حکومتی ذمہ داریوں میں رکاوٹ بن رہا ہے اور اس کیس کا خاتمہ ملک کے مفاد میں ہوگا۔
وزیراعظم کے وکیل کی جانب سے صدر کو بھیجے گئے خط میں کہا گیا ہے کہ نیتن یاہو کو یقین ہے کہ ٹرائل مکمل ہونے کے بعد وہ بری ہو جائیں گے، تاہم اس وقت مقدمے کی کارروائی ملک میں تقسیم پیدا کر رہی ہے اور قومی اتفاق رائے کے لیے اس کا خاتمہ ضروری ہے۔ وکلا کے مطابق مسلسل سماعتوں کی وجہ سے وزیراعظم کے لیے حکومتی امور سرانجام دینا مشکل ہوتا جا رہا ہے۔
حکمران جماعت کے بیان میں نیتن یاہو کا کہنا ہے کہ معافی کی درخواست صدر کو بھجوا دی گئی ہے اور وہ امید رکھتے ہیں کہ ملک کے مفاد میں اس اقدام کی حمایت کی جائے گی۔ انہوں نے بتایا کہ انہیں ہفتے میں تین بار عدالت میں پیش ہونا پڑتا ہے جو کسی اور شہری کے لیے لازم نہیں ہوتا، جبکہ وہ عوامی اعتماد حاصل کرنے کے لیے کئی بار انتخابات جیت چکے ہیں۔
دوسری جانب اپوزیشن لیڈر یایر لیپڈ نے معافی کی شدید مخالفت کرتے ہوئے کہا ہے کہ نیتن یاہو کو اس وقت تک ریلیف نہیں ملنا چاہیے جب تک وہ جرم کا اعتراف، پچھتاوے کا اظہار اور سیاست سے علیحدگی اختیار نہ کریں۔
اسرائیلی صدر کے دفتر کے مطابق وزیراعظم کی درخواست غیرمعمولی نوعیت کی ہے اور اس کے سنگین اثرات ہو سکتے ہیں۔ صدر متعلقہ اداروں کے مشورے کے بعد ذمہ داری کے ساتھ فیصلہ کریں گے۔
واضح رہے کہ نیتن یاہو پر رشوت، دھوکہ دہی اور غبن سمیت متعدد الزامات ہیں، تاہم وہ ان تمام الزامات کی تردید کرتے آ رہے ہیں۔
