اسلام آباد: پاکستان کو اگلی 1.2 ارب ڈالر کی قسط کی منظوری کے لیے بین الاقوامی مالیاتی فنڈ (آئی ایم ایف) کا ایگزیکٹو بورڈ کل اجلاس کرے گا۔ وزارتِ خزانہ کی جانب سے اجلاس کا شیڈول جاری کر دیا گیا ہے۔
پاکستان اور آئی ایم ایف کے درمیان 14 اکتوبر 2025 کو اسٹاف لیول معاہدہ طے پایا تھا، جس کے بعد پاکستان نے قرض کی قسط کے لیے تمام شرائط پوری کر دی ہیں۔ ذرائع کے مطابق اس قسط میں 1 ارب ڈالر آئی ایم ایف کے عام قرض پروگرام کے تحت اور 20 کروڑ ڈالر کلائمیٹ فنانسنگ کی مد میں جاری کیے جائیں گے۔
ذرائع نے بتایا کہ آئی ایم ایف نے شرط رکھی تھی کہ بورڈ اجلاس سے پہلے پاکستان کرپشن اینڈ گورننس ڈایئگناسٹک رپورٹ جاری کرے، جسے پاکستان نے مکمل کر دیا ہے۔ وزارتِ خزانہ کے مطابق آئی ایم ایف کے ڈپٹی ڈائریکٹر بو لی نے پاکستان کے جاری اصلاحی سفر کو سراہا اور ملک کو اصلاحات اور بحالی کے صحیح راستے پر گامزن ہونے کی بہترین مثال قرار دیا۔
پاکستان کے لیے سات ارب ڈالر کے استحکام پروگرام کے علاوہ 1.3 ارب ڈالر کی معاونت آر ایس ایف (ریزیلیئنس اینڈ سسٹین ایبلیٹی فیسلٹی) کے تحت فراہم کی جا رہی ہے۔ اس کا مقصد موسمیاتی خطرات سے نمٹنے، مالیاتی اور اقتصادی لچک بڑھانے، گرین بجٹنگ کو فروغ دینے اور موسمیاتی طور پر مضبوط انفرااسٹرکچر کی منصوبہ بندی میں مدد فراہم کرنا ہے۔
وزارتِ خزانہ کے عہدیدار نے بتایا کہ آئی ایم ایف نے پاکستان کی موسمیاتی خطرات سے نمٹنے اور طویل مدتی لچک قائم کرنے کی کوششوں میں بھرپور حمایت کا اعادہ کیا ہے۔ یہ پیش رفت وزیرِ خزانہ محمد اورنگزیب کے 23 ویں دوحہ فورم میں شرکت کے موقع پر سامنے آئی، جہاں وہ ایک اعلیٰ سطح کے پینل میں مقرر تھے۔
آئی ایم ایف کی ویب سائٹ کے مطابق پاکستان کو 8 دسمبر 2025 کے ایگزیکٹو بورڈ ایجنڈے میں شامل کیا گیا ہے، جس میں ایکسٹینڈڈ فنڈ فیسلٹی (EFF) کے دوسرے جائزے اور ریزیلیئنس اینڈ سسٹین ایبلیٹی فیسلٹی (RSF) کے پہلے جائزے کے تحت 1.2 ارب ڈالر کی قسط کی منظوری پر غور کیا جائے گا۔
