لاہور:وزیراعلیٰ پنجاب مریم نواز شریف کے وژن کے تحت صوبائی دارالحکومت لاہور میں پہلے سرفیس واٹر ٹریٹمنٹ پلانٹ کے منصوبے کی منظوری دے دی گئی ہے۔ اس منصوبے کی منظوری 52ویں پی ڈی ڈبلیو پی اجلاس میں دی گئی۔
منصوبے کے تحت لاہور میں بی آر بی کینال پر سرفیس واٹر ٹریٹمنٹ پلانٹ نصب کیا جائے گا، جو ایشین انفراسٹرکچر انویسٹمنٹ بینک کے تعاون سے مکمل کیا جائے گا۔ اس منصوبے کے ذریعے یومیہ 54 ملین گیلن سطحی پانی کو صاف کرکے قابلِ استعمال بنایا جا سکے گا۔
واٹر ٹریٹمنٹ پلانٹ سے مغلپورہ، باغبانپورہ، فتح گڑھ اور شادی پورہ سمیت لاہور کے 17 لاکھ سے زائد شہریوں کو صاف پانی کی فراہمی ممکن ہو سکے گی۔ منصوبہ 120 ایکڑ اراضی پر تعمیر کیا جائے گا اور اس میں 5 میگا واٹ سولر انرجی سسٹم بھی نصب کیا جائے گا، جس سے بجلی کی پیداوار ممکن ہوگی۔
حکام کے مطابق واٹر ٹریٹمنٹ منصوبہ سال 2031 تک مکمل کیا جائے گا۔ اس حوالے سے سیکرٹری ہاؤسنگ نورالامین مینگل نے کہا ہے کہ وزیراعلیٰ پنجاب کی ہدایت پر اہم ترقیاتی منصوبوں پر کام شروع کیا جا رہا ہے اور جلد اس منصوبے کو منظوری کے لیے ایکنک میں پیش کیا جائے گا۔ ان کا کہنا تھا کہ صوبے بھر میں آلودہ پانی کو قابلِ استعمال بنانے کے لیے عملی اقدامات جاری ہیں۔
