پشاور: مسلم لیگ (ن) خیبرپختونخوا کے صدر انجینئر امیر مقام نے صوبائی حکومت پر سخت تنقید کرتے ہوئے کہا ہے کہ وزیرِ اعلیٰ خیبرپختونخوا اپنے صوبے کے ہسپتالوں اور صحت کے سنگین بحران پر بات کرنے سے گریز کر رہے ہیں، جبکہ سہیل آفریدی کی حالیہ تقریر زمینی حقائق کے برعکس تھی۔
اپنے جاری بیان میں امیر مقام نے کہا کہ زیرو کرپشن کے دعوؤں کے باوجود خیبرپختونخوا میں بی آر ٹی اور صحت کارڈ جیسے بڑے اسکینڈلز سامنے آ چکے ہیں۔ ان کا کہنا تھا کہ بلین ٹری، گندم اور دیگر متعدد اسکینڈلز بھی نیب اور عدالتی رپورٹس کا حصہ ہیں، جو صوبائی حکومت کی کارکردگی پر سوالیہ نشان ہیں۔
انہوں نے کہا کہ اگر صوبے میں سب کچھ شفاف اور درست ہے تو نوجوان روزگار اور بہتر سہولیات کے لیے دربدر کیوں پھر رہے ہیں۔ امیر مقام کے مطابق عوام کو نعروں کے بجائے عملی اقدامات کی ضرورت ہے۔
مسلم لیگ (ن) کے صوبائی صدر نے کہا کہ مریم نواز ایک آئینی اور منتخب وزیرِ اعلیٰ ہیں اور ان پر ذاتی نوعیت کے حملے دراصل سیاسی ناکامی کا ثبوت ہیں۔ انہوں نے ایک بار پھر سہیل آفریدی کی تقریر کو زمینی حقائق کے منافی قرار دیا۔
امیر مقام کا مزید کہنا تھا کہ عوام اب نعروں اور دھمکیوں سے آگے بڑھ چکے ہیں اور ریاست کو بلیک میل کرنے کی سیاست مزید نہیں چل سکتی۔
