چترال میں موسلادھار بارشوں اور برفباری کا سلسلہ جاری ہے، جس کے باعث مختلف علاقوں میں لینڈ سلائیڈنگ ہوئی ہے، اور کئی اہم سڑکیں بند ہوگئی ہیں۔ خراب موسم کے نتیجے میں شہریوں کو شدید مشکلات کا سامنا ہے، جبکہ درجنوں کچے مکانات منہدم ہوگئے اور سیکڑوں درخت گر گئے ہیں۔
موسم کی خرابی کے باعث چترال کے مختلف علاقوں میں بجلی کی فراہمی بھی معطل ہو گئی ہے، جس سے مقامی آبادی کو مزید پریشانیوں کا سامنا ہے۔ شدید بارشوں اور برفباری کے نتیجے میں آڑو، بادام، ناشپاتی اور سیب کی فصلوں کو بھی نقصان پہنچا ہے، جس سے مقامی کسانوں کو مالی مشکلات کا سامنا کرنا پڑ سکتا ہے۔
ڈپٹی کمشنر چترال کے مطابق خراب موسم کے پیش نظر ضلع بھر کے تمام اسکولوں میں دو روز کی چھٹی کا اعلان کر دیا گیا ہے، تاکہ طلبہ اور اساتذہ کو کسی بھی ممکنہ خطرے سے محفوظ رکھا جا سکے۔
ادھر، کوہستان اور چلاس میں بھی شدید بارشوں اور لینڈ سلائیڈنگ کے باعث شاہراہ قراقرم تین مختلف مقامات پر بند ہو چکی ہے، جس کی وجہ سے سفری مشکلات میں اضافہ ہو گیا ہے۔ متعلقہ حکام راستے کھولنے کے لیے بحالی کے کاموں میں مصروف ہیں۔
