ٹیکساس کی ریاستی ایوانِ نمائندگان نے 23 مارچ کو “یومِ پاکستان” کے طور پر تسلیم کرنے کی قرارداد متفقہ طور پر منظور کرلی۔ یہ تاریخی فیصلہ ٹیکساس میں مقیم پاکستانی نژاد امریکی کمیونٹی کے لیے ایک اہم اعزاز ہے، جو ان کی سماجی، معاشی، مذہبی اور ثقافتی خدمات کے اعتراف میں کیا گیا ہے۔
یہ قرارداد ریاستی رکنِ اسمبلی ڈاکٹر سلیمان لالانی نے پیش کی، جس میں اس بات کو تسلیم کیا گیا کہ پاکستانی ٹیکسانز نے اپنی پیشہ ورانہ مہارت، ثقافتی ورثے اور ترقی پسند اصولوں کے ذریعے ٹیکساس کی ترقی میں اہم کردار ادا کیا ہے۔
قرارداد کی منظوری کے موقع پر ٹیکساس میں پاکستان کے قونصل جنرل محمد آفتاب چوہدری بھی ایوان میں موجود تھے۔ انہوں نے اس موقع پر ایوان کے اسپیکر ڈسٹن بروز سے ملاقات کی اور قرارداد کی منظوری میں ان کے تعاون پر شکریہ ادا کیا۔ اس ملاقات میں قونصل جنرل نے اسپیکر اور دیگر ریاستی نمائندوں اور کاروباری شخصیات کو پاکستان کے دورے کی دعوت بھی دی، تاکہ دونوں ممالک کے درمیان معاشی اور ثقافتی تعلقات کو مزید فروغ دیا جا سکے۔
بعد ازاں، ڈاکٹر سلیمان لالانی کی جانب سے ٹیکساس کی قانون ساز اسمبلی کے اراکین اور معزز مہمانوں کے اعزاز میں ایک افطار ڈنر کا اہتمام کیا گیا، جس میں قونصل جنرل سمیت مختلف شعبوں سے تعلق رکھنے والی شخصیات نے شرکت کی۔
یہ فیصلہ نہ صرف پاکستانی امریکی کمیونٹی کے لیے باعثِ فخر ہے بلکہ اس سے پاکستان اور امریکہ کے درمیان تعلقات کو مزید مستحکم کرنے میں بھی مدد ملے گی۔
