اسلام آباد: حکومتی اعلانات اور دعوؤں کے باوجود شہریوں کو چینی مہنگے داموں خریدنے پر مجبور ہونا پڑ رہا ہے، جبکہ بعض شہروں میں چینی کی قیمت 180 روپے فی کلو تک جا پہنچی ہے۔
ادارہ شماریات کے تازہ ترین اعداد و شمار کے مطابق گزشتہ ہفتے چینی کی اوسط قیمت میں 1 روپے 61 پیسے کمی دیکھنے میں آئی ہے۔ تاہم، اسلام آباد، راولپنڈی، کراچی اور پشاور میں چینی بدستور مہنگی فروخت ہو رہی ہے۔
ادارہ شماریات کے مطابق ملک میں چینی کی زیادہ سے زیادہ قیمت 180 روپے فی کلو جبکہ اوسط قیمت 168 روپے 80 پیسے فی کلو ریکارڈ کی گئی ہے۔ اس کے برعکس، حکومت کی جانب سے چینی کی سرکاری قیمت 164 روپے فی کلو مقرر کی گئی تھی۔
یاد رہے کہ نائب وزیراعظم اسحاق ڈار نے چینی کی ریٹیل قیمت 164 روپے فی کلو مقرر کرنے کا اعلان کیا تھا جبکہ وفاقی وزیر برائے نیشنل فوڈ سیکیورٹی رانا تنویر نے چینی کی قیمت 163 روپے فی کلو ہونے کا دعویٰ کیا تھا۔ تاہم، عوام کو حکومتی مقرر کردہ نرخ پر چینی دستیاب نہیں، جس سے شہریوں میں شدید مایوسی اور غصے کی لہر دوڑ گئی ہے۔
